من سنتين تقريباً وبالتحديد في ليلة من ليالي شهر أغسطس الحارة وهمسات شهر رمضان الساحرة أطلقت مدونتي "سطور كُتبت بماء"، وكان هذا القرار بإطلاق تلك المدونة بعد عودتي من رحلة قصيرة مع الجامعة سيطرت علي بعدها فكرة أني ممكن أتكلم والعالم سيسمعني، حتى وإن كان عدد المتابعين للمدونة 9 أفراد وإجمالي مشاهدتها 279.
وماله هما دول قليلن...
تابعت المدونة باهتمام 3 أو 4 شهور وكان غرضي أن أكتب فيها خواطر وأدب.. يعنى محاولاتي البسيطة للكتابة بدأت تشوف النور وبصراحة أصحابي عداهم العيب في موضع تشجيعي ده .. قاموا بالواجب معايا وزيادة.. بس أنا انشغلت شوية.. وشوية بطلت اكتب.. وشوية اتعودت على الفيس بوك وبقيت استعمل تدويناته.. وشوية شوية ولأني مش بعرف أدون غير على الورق بطلت انشر اللي بكتبه على الورق ....
ورق كتير أوي أووووي كتبته في السنتين دول.. وورق أكتر قبل السنتين بس على رأي نذار قباني لما قال سطوراً لا مبالية أبعثرها على دفتر.. بلا أملٍ بأن... تبقي بلا أملٍ بأن تنشر.
هرجع أدون تاني ... بفكر اعمل زي الراهب اللي دون كل ذكرياته ودفنها وانطلق إلي عالم جديد بلا ذاكرة..
حاجات كتير حصلت في السنتين عايزة اكتب عنها.. حاجات اتغيرت .. وحاجات كبرت وحاجات صغرت.. وناس راحت وناس جت... يااااااااه دة بين لحظة والتانية الدنيا بتتغير واحنا كمان بنتغير...
المهم عودة للتدوين... وللسطور المكتوبة بالماء.. عودة لفيروز وعمر خيرت والسهر على الكتابة والقراءة لوش الفجر.. عودة لاباجورتي المنورة والبيت كله نايم ومضلم.. عودة لحاجات كتير صغيرة بس كانت بتفرحني بجد ...عودة للتدوين.
رائع ماسطره يراعك سلمى، ورائع هو هذا البوح الممزوج بحب الكتابة والتدوين ، فنحن نكتب عن أنفسنا وعن الأخرين ، عن تجاربنا، عن حياتنا بحلوها ومرها ، فالكتابة عالم آخر، وحياة أخرى، فيها كل المتعة ، كل النغم ، كل الأمل، وأيضا كل الألم. كل الألق والعبير والضياء. سرنى حقا المرور من هنا .
ردحذفDr_mmsaleh على تويتر
أشكرك أستاذ محمد، واتمنى أن تداوم على مرورك الكريم على مدونتي :-) سعدت بتعليقك
ردحذفتحياتى