الشمس قادرة على أن تبعث الدفء والتفاؤل

على العكس من الجميع أعشق الشمس وأجد فيها ما يدعو إلي التأمل والعشق أكثر من القمر صديق السهارى وعشاق الليل...

الشمس بالنسبة لي حالة أكثر خصوصية وهي  مخلوق معجز في كل حالاته، وأكثر مخلوق يدفعني على التفاؤل.. حين أراها تشق ظلام الليل الحالك وتشرق.. وحين أراها تعاند السحب والبرد والشتاء لترسل لنا شعاع دفء يشحن طاقتنا على التحمل.. أنا أنظر إلي الشمس الآن يا بلادي.. وأطلب من الله أن يرسل لي مع الشمس أمارة بأنك شمس حريتك  ستشرق قريباً.. يا الله.. ليس لها من دونك كاشفة

تفاءلوا بالخير تجدوه.. جملة لطالما شعرت بواقعها الرائع على أفكاري ومشاعري ونظرتي للأمور.. لكن لطالما وجدت فرقاً بين التفاؤل بالخير والتوهم به..

حين أتفاءل أنا لا أتفاءل بما أراه على الواقع لأن الواقع مهما تفاءلنا سنراه فيه أشياء سيئة لا نريد أن نراها.. أنا أتفاءل بإيماني.. أتفاءل بعدل ربي القادر على كل شيء.. أتفاءل بقدرته على تبديل الدنيا من حال إلي حال بين طرفة عين وانتباهتها.

تفاءلي يا مصر خالقك لن يضيعك.. ولن يضيع دماء من ضحوا لأجلك .. أصمدي سنراكي يوماً حرة أبية.. وسترسم شمسك الحرة على جلود أبناءك السمرة أجمل لوحة للعزة والكرامة والحرية.. وسنرفع يا بلادي يوما صور من ضحوا لأجلك إلي جوار الشمس.. 

الصورة من فليكر

مناجاه

إلهي! لا تعذبني ، فإني
مقرّ بالذي قد كان مني !

فما لي حيلة إلا رجائي
لعفوك ، إن عفوت وحسن ظني

وكم من زلة لي في الخطايا
وأنت علي ذو فضل ومنِ

إذا فكرت في ندمي عليها
عضضت أناملي وقرعت سني

أجنّ بزهرة الدنيا جنونا
وأقطع طول عمري بالتمني

ولو أني صدقت الزهد عنها
قلبت لأهلها ظهر المجنِ

يظن الناس بي خيراً
وإني لشر الخلق إن لم تعف عني

قهوة بالحليب

مثلها مثل كل شيء أحببته في حياتي بشدة.. يؤلمني!

كنت دائماً أشكو إليك آلام معدتي من فرط شربي للقهوة.. وكنت دائماً تنصحني بأن أقلل منها أو أن أضيف إليها بعض الحليب.

لم أستطع أن أقلل منها.. لأني كنت أدمنها مثلما كنت أدمنك.. أخذت بنصيحتك وبت أضع عليها اللبن.. وأصبحت القهوة باللبن التي لم أعرفها أو أجربها من قبلك هي مشروبي المفضل.. وبعد الفراق باتت المشروب الذي يذكرني بك.. وبعدما كانت القهوة تؤلم معدتي فقط.. باتت القهوة المضاف إليها الحليب تؤلم معدتي وذاكرتي وقلبي وجسدي كله وسائر الأشياء من حولي.

علمت بعد ذلك أن القهوة باللبن من أسوأ العادات الغذائية التي يمكن أن يعتاد عليها أحد.. مثلما كنت أنت من أسوأ الأشخاص الذي من الممكن أن يعتاد عليه إنسان.

ساعدني كي أقلع عنك.. ساعدني أنساك.. وأعدك إن حدث هذا سأساعد نفسي أن تقلع عن القهوة المضاف إليها حليب..

أنا حقاً أمر بكل أعراض الانسحاب التي يمر بها المدمنون.. ولكني لم أدمن مادة مخدرة.. أنا أدمنت شخصاً وقهوة غير صحية مضاف إليها بعض الحليب. 

-----

ســــيـــــن 

لمحة ضوء

على مدار حياتنا يضع الله في طرقنا أشخاص رائعون.. قد يكونوا مثل شعاع الضوء الذي ينير طريق مظلم  للحظة وينطفئ بعد ذلك...

لكن يبقي أثرهم في حياتنا طويلاً.. ونسير كثيراً على هدي لمحة الضوء التي صنعوها و أوضحت لنا الطريق لحظة وانطفأت.

--------

ســـيـــــن 

مجزرة الحولة

للى مفكرين أن شارون وقادة إسرائيل هما أشهر سفاحين في العالم لالالالالالالا دة طلعوا ميعرفوش حاجة عن الإجرام ولا القتل.. المجرم ابن المجرم عرة ما أنجبت سوريا وزبالة الإنسانية ممكن يقف يعلمهم ويديهم دروس في الإجرام والقتل... الله يلعنك يا كلب .. حتى الحيوانات مبتقتلش أطفال بالبشاعة دي..
اسفة لو الصورة صادمة.. بس دى أقل الصور بشاعة..
معلش يا سوريا دم أطفالك مسك الجنة.. متزعليش من قادة العرب اللي واقفين يتفرجوا.. متزعليش من قطر والسعودية والبلدان اللى صوتها مبيطلعش غير فى المزايدات..متزعليش من ماما أمريكا حامية الإنسانية وداعمة حقوق الإنسان.. أصل لو كان فيكى بترول كانت جرت عليكي زي ما عملت في ليبيا.
احنا اسفين يا سوريا ملهيين في مصيبتنا ومش قادرين نساعد أطفالك اللى بيتدبحوا.. وعلى فكرة بيتدبحوا هنا مش تعبير مجازي .. دة وصف حقيقي للى عبيد الكلب عملوه في أكتر من 36 طفل مكملوش 10 سنين..
واللى قلبوا جامد يعمل سيرش على الصور ويشوفها.. عشان انا قلبي كان هيقف من بشاعتها.

ناويين تكملوا ولا؟؟

صباح الفل

رغم أني نايمة معيطة امبارح بسبب اللى حصل، وكمل عليا الخبر بتاع مجزرة الحولة اللي مجروم سوريا نفذها في 50 طفل، بس صحيت من النوم جوايا دفعة تفائل وأمل كبيرة مش عارفة ايه مصدرهم .. لعله خير

مبدئياً وقبل أي أسئلة.. لو وصلنا ليوم الإعادة ولسة مفيش قدامنا غير اختيارين شفيق ومرسي هدعم محمد مرسي.. مش إعجاباً بميكروباص النهضة ولا بشخصية الاستبن لا سمح الله بس لأنها وقتها الاختيار مش هيكون بين شفيق ومرسي، الاختيار هيكون بين النظام القديم والنظام اللى هتحطه الثورة، مهما كان هختار النظام اللي هتحطه الثورة حتي لو كان أسوأ.. بس هيبقي أسمنا حطينا قاعدة تغيير، لكن لو شفيق جه هتبقي دى نكسة حقيقة لسنة ونص بنحاول نجيب حق الاختيار دفعنا تمنهم دم وإصابات واعتقالات ومظاهرات واعتصامات في الشوارع في عز البرد وفي حر الصيف.

من الآخر أنا لو قرد من جنينة الحيوانات نزل انتخابات قصاد شفيق هنتخب القرد!

بس ارجع وأقول إحنا ليه نستني 18 يوم لما نتزنق في الاختيار دة وميبقاش قدامنا غيره؟؟

فككو بقى من حوارات الولولة والشهدا اللي بيتفوا علينا من السما وميدان التحرير اللي عايز يسيبنا ويمشي.. فاكس الكلام دة مش وقته دلوقتي.. دلوقتي في ناس كتيير قالت إن كان في بطاقات دوارة وأعضاء من الجيش والشرطة اتسجلت أسمائهم في الكشوف الانتخابية وراحوا انتخبوا.. اللى شاف أي أنتهاك أو يراسل بيه حملات المرشحين وهما هيقدموا طعون بالانتهاكات دي.. ودة ايميل حملة حمدين صباحي اللي أطلقوا الدعوة دي Hamlet.hamdeen@gmail.com

الحاجة التانية هو مش المخفي شفيق دة عليه قضية بتاعة قانون العزل، ولسة المحمكة محكمتش فيها.. طب مستنين ايه لما يحكموا.. لما يبقي رئيس وينفخنا كلنا.. خليكوا فاكرين إن الانتخابات كانت هتتعمل في 2013 ولولا ضغط الشارع والعيال بتوع التحرير ومحمد محمود ومجلس الوزراء مكنتش اتعملت دلوقتي.. فلسة الشارع في إيدينا.

وأكيد لسة في حلول كتير بس عايزة اللي يكتشفها.

أصدقائي من الإخوان.. مش شطارة انكوا تحشدوا الناس ورا مرشحكم صد مرشح الفلول.. ولا بلاش تغالوا في الطعن على وطنية وأخلاق اللي هيقاطع أو مش هيدي له صوته، لأن مواقفكم من حاجات كتير بعد الثورة خليتكوا متفرقوش عن الفلول في نظر ناس كتير أنا واحدة منهم، هما قتلوا وانتوا وقفتوا تتفرجوا علي الدم، وبباركتوا للي قتل كمان واديتوا له شرعية وصقفتوا له وحيتوا في مجلسكم، ومبدأتوش تنادوا بسقطوا إلا لما وقف ضد مصالحكوا، فمش وقت مزايدات عشان اللي بيته من إزاز ميحدفش الناس بالطوب.

وكمان مرسي زيه زي أبو الفتوح وحمدين ساهم في تفتيت الأصوات وأدي للفلول فرصة أنهم ينجحوا.. بصراحة كل المرشحين عندي سواء في النقطة.. كل واحد مفكرش غير في مصالحه وفي أنه يبقي رئيس جمهورية.. قسموا أصوات الثورة وكفروا الناس بيها أكتر ما هم كفرانيين.. واللي جاي يقولك الشعب المصري شعب عبيد يتلهي الله يكرمه اليومين دوول مش ناقصاه أصوات حمدين وابو الفتوح أكتر بكتيير من الأصوات اللي أخدهم شفيق.. يعني الشعب اختار الثورة بس الثورة هي اللي متفرقة.

والإخوان لازم يعرفوا أن الناس اللي هتدعم مرسي هيكون دعم مشروط بأنهم يقدموا ضمانات لمدنية الدولة والديمقراطية والمحاكمات لرموز الفساد وتطهير المؤسسات، وحقوق الشهداء.. والاتفاق علي تأسيسية الدستور أن يكون فيها تمثيل لكل طوائف الشعب بجد .. مش لجنة زي بتاعة أم أيمن.

أخيراً سواء نجح شفيق أو مرسي الاثنين مش هستني منهم خير.. بس اللي هيمسك البلد دلوقتي بيعتبر ماسك بلد على مية بيضا لا دستور ولا قانون ولا في مؤسسة واحدة توحد ربنا ماسكة نفسها وشادة حيلها.. والأحزاب والحركات السياسية كلها من اليمين للشمال زي خيبتها.

المعركة الجاية معركة الدستور .. ناويين تشتغلوا عليها ولا هتقعدوا تعيطوا لحد ما العسكر يلعبها وتكملوا عياط على الدستور كمان؟؟!!!

تهيؤات رئاسية

أوقات بسأل نفسي هو واحد زي عمرو موسي دة مرشح نفسه للرئاسة لييييه؟؟ يعنى دة واحد عمره 76 سنة.. لا قدر الله لو كسب هيمشي من المنصب وهو عندو 80 سنة .. طبيعى ان الناس لما بتكبر طاقتها بتقل.. وجهدها بيقل وطموحها بيقل.. دى فطرة ربنا اللى خلق البشر عليها... اللى فى عمره دلوقتى بيتقاعد.. بيشتري بيت في مكان هادي ويقعد يسمع موسيقى ويقرا كتب ويستمتع بوقته مع أحفاده.. دة عن الفطرة البشرية اللى مش هنختلف عليها... بس ممكن نختلف في آرائنا من مواقفه في نظام مبارك ولا صمته على هذا النظام.. ولا دوره فى الجامعة العربية.. ولا كم الخواء اللى في كلامه.. وبرنامجه اللى تقريبا بيعيد النظام بأبسط مظاهره.

وشفيق ربنا يكمله بعقله بصراحة... لازم نراعي ظروفه الراجل قتل واتقتل.. وبالنسبة له للاسف الثورة

نجحت. قلباً وقالباً مع خالد على... دم جديد وروح جديدة... وشوفت في مصر الشابة القوية اللى عايزة اشوفها واعيش فيها... بس عقلي بيقولى أنه محتاج يثقل شوية... هو والبرادعي أتمني أشوفهم من أول رجال الرئيس القادم أيٍ كان.

يتبقى الاتنين اللى محيرني حمدين صباحي وأبو الفتوح أبو الفتوح منهجه احتوائي للغاية.. لكن متخوفه منه في سيناريوهين الاول صدامه مع الإخوان والثاني صلحه معاهم... بالبلدي لو اتخانق مع الاخوان هيتخانق اووي.. ولو اتصالح معاهم هنبقا لبسنا احنا.

وحمدين صباحي برضة رجل لا اختلف عليه.. لكن عندي حساسية مفرطة من الناصرية اللى على الرغم منه أنه بينكرها إلا أنها واضحة وضوح الشمس في كل تصرفاته وأفكاره وحركاته.. وإن كنت معجبة بالناصرية فى فكرة القومية والمشاريع القومية اللى

. أما عن مرسي فبيعداً عن ان استبن.. مش مقتنعة ان البلد ممكن تنهض بالمشاريع العملاقة اللى هتتنفذ بقروض من برة.. مقتنعة اكتر ان الفكرة دي هتلبسنا فى الحيطة اكتر :/ وعمرى ما هنتخب مرشح حواليه كم الكذب والتضليل والمغيبين دوول.

وبالرغم من أني لاقية أسباب كتير للى بيدعوا للمقاطعة ومتفهمة دوافعهم.. إلا أني مش لاقية أهداف حقيقة ممكن نكسبها من المقاطعة سوي إننا نتدبس في مجلس العار والخيانة وقت أكتر.. والنتيجة هتكون دم أكتر. 

بس لازم نعترف بحقيقة ان الكتل التصويتية لكل مرشحين الثورة مضروبة بشدة.. ومش هحمل حد مسؤولية دة غيرهم.. لأن هما اللى فشلوا في في إيجاد حلول وتكوين فرق رئاسية... فى الوقت اللى عمل فى الفلول والمجلس العسكري بكل قوتهم على تعطيل الدستور والدعاية لمرشحينهم بقوة.. واللى للأسف ساعدهم على دة مجلس الأغبياء المروج له إعلامياً بمجلس الشعب.

مش قادرة اتخيل أن ممكن بعد كل اللى حصل دة وكل الناس اللى ماتت دي يرجع تانى مبارك في صورة موسي أو شفيق أو واحد حط ايده فى ايد العسكر وما افتكرش الثورة غير لما وقفوا ه فى مصالحه.

بس ارجع واقول لا يغير الله ما بقوم حتي يغيروا ما بأنفسهم.. واحنا لسة في أنفسنا الأنا والفرقة والضعف اللى مسيطرين علينا

اللهم ولي علينا من يصلح... ولا تسلط علينا بذنوبنا من لا يخافك ولا يرحمنا.