اعتراف..
أنا بحب أزور بروفايلات أصحابي على الفيس.. واما يوحشوني بحب أشوف صورهم واقلب فى الكلام اللى هما كاتبينه.. ولما بلاقي حد كاتب انه متضايق أو زعلان بحاول اتصل بيه اطمن عليه.. والناس اللي انا متعودة عليها بتكتب على طول بقلق لما بيعدي كزة يوم ومبلاقيهومش كتبوا حاجة.
مش عارفة أنا كدة فى أي درجة من الإدمان.. بس الموضوع بقى بالنسبة لى معقد جداا.. البعد عن المكان اللي فيه أهلك وأصحابك بيخلى مواقع التواصل الاجتماعي مسكن قوى لوجع دائم اسمه "الافتقاد"، ووسيلة تحفظ علاقتك بيها مع ناس انت فعلا بتحبهم وجمعتكم الحياة فى مواقف معينة وصعب تجمعكم تاني.
زملاء دراسة أو كورس أو مشروع ما أو أصحاب سافروا مثلا.
حياتنا الزحمة السريعة لايقة عليها فكرة انك تحرك صباعك على شاشة الكترونية لمدة دقائق فى بداية يومك فتعرف آخر أخبار صحابك اللى ممكن يكونوا بقوا عايشين فى قارة تانية، وحتى الموجودين معاك فى نفس البلد، الحياة شادة كل واحد فى دوامة .. بقى صعب تشوفهم كل يوم أو كل أسبوع.. بقت المواعيد بتترتب بظروفها، والسؤال فى التليفون بقى كل فين وفين.. بتبقى عايزة تتواصل معاهم حتى لو تواصل افتراضي بس انك تطمن على وجودهم بخير ولو من كلمات كاتبينها من ورا كي بورد مش فكرة سيئة.
اه مينفعش يكون التواصل بس تواصل افتراضي من ورا كيبوردات وتليفونات... بس لحد ما يتحقق الحلم بجزيرة معزولة عن العالم واختار اخد معايا فيها الناس اللي بحبهم واخليهم هما كمان يختاروا عدد معين من الناس اللي بيحبوهم، ونتجمع كل ليلة فى الجزيرة دى نسهر ونسمع موسيقى ونتكلم ...مفيش مانع من زيارة بروفايلات الأصدقاء..وسرقة فنجان قهوة مع بعض منهم كلما استطعنا إلي ذلك سبيلا.
