مجزرة الحولة

للى مفكرين أن شارون وقادة إسرائيل هما أشهر سفاحين في العالم لالالالالالالا دة طلعوا ميعرفوش حاجة عن الإجرام ولا القتل.. المجرم ابن المجرم عرة ما أنجبت سوريا وزبالة الإنسانية ممكن يقف يعلمهم ويديهم دروس في الإجرام والقتل... الله يلعنك يا كلب .. حتى الحيوانات مبتقتلش أطفال بالبشاعة دي..
اسفة لو الصورة صادمة.. بس دى أقل الصور بشاعة..
معلش يا سوريا دم أطفالك مسك الجنة.. متزعليش من قادة العرب اللي واقفين يتفرجوا.. متزعليش من قطر والسعودية والبلدان اللى صوتها مبيطلعش غير فى المزايدات..متزعليش من ماما أمريكا حامية الإنسانية وداعمة حقوق الإنسان.. أصل لو كان فيكى بترول كانت جرت عليكي زي ما عملت في ليبيا.
احنا اسفين يا سوريا ملهيين في مصيبتنا ومش قادرين نساعد أطفالك اللى بيتدبحوا.. وعلى فكرة بيتدبحوا هنا مش تعبير مجازي .. دة وصف حقيقي للى عبيد الكلب عملوه في أكتر من 36 طفل مكملوش 10 سنين..
واللى قلبوا جامد يعمل سيرش على الصور ويشوفها.. عشان انا قلبي كان هيقف من بشاعتها.

ناويين تكملوا ولا؟؟

صباح الفل

رغم أني نايمة معيطة امبارح بسبب اللى حصل، وكمل عليا الخبر بتاع مجزرة الحولة اللي مجروم سوريا نفذها في 50 طفل، بس صحيت من النوم جوايا دفعة تفائل وأمل كبيرة مش عارفة ايه مصدرهم .. لعله خير

مبدئياً وقبل أي أسئلة.. لو وصلنا ليوم الإعادة ولسة مفيش قدامنا غير اختيارين شفيق ومرسي هدعم محمد مرسي.. مش إعجاباً بميكروباص النهضة ولا بشخصية الاستبن لا سمح الله بس لأنها وقتها الاختيار مش هيكون بين شفيق ومرسي، الاختيار هيكون بين النظام القديم والنظام اللى هتحطه الثورة، مهما كان هختار النظام اللي هتحطه الثورة حتي لو كان أسوأ.. بس هيبقي أسمنا حطينا قاعدة تغيير، لكن لو شفيق جه هتبقي دى نكسة حقيقة لسنة ونص بنحاول نجيب حق الاختيار دفعنا تمنهم دم وإصابات واعتقالات ومظاهرات واعتصامات في الشوارع في عز البرد وفي حر الصيف.

من الآخر أنا لو قرد من جنينة الحيوانات نزل انتخابات قصاد شفيق هنتخب القرد!

بس ارجع وأقول إحنا ليه نستني 18 يوم لما نتزنق في الاختيار دة وميبقاش قدامنا غيره؟؟

فككو بقى من حوارات الولولة والشهدا اللي بيتفوا علينا من السما وميدان التحرير اللي عايز يسيبنا ويمشي.. فاكس الكلام دة مش وقته دلوقتي.. دلوقتي في ناس كتيير قالت إن كان في بطاقات دوارة وأعضاء من الجيش والشرطة اتسجلت أسمائهم في الكشوف الانتخابية وراحوا انتخبوا.. اللى شاف أي أنتهاك أو يراسل بيه حملات المرشحين وهما هيقدموا طعون بالانتهاكات دي.. ودة ايميل حملة حمدين صباحي اللي أطلقوا الدعوة دي Hamlet.hamdeen@gmail.com

الحاجة التانية هو مش المخفي شفيق دة عليه قضية بتاعة قانون العزل، ولسة المحمكة محكمتش فيها.. طب مستنين ايه لما يحكموا.. لما يبقي رئيس وينفخنا كلنا.. خليكوا فاكرين إن الانتخابات كانت هتتعمل في 2013 ولولا ضغط الشارع والعيال بتوع التحرير ومحمد محمود ومجلس الوزراء مكنتش اتعملت دلوقتي.. فلسة الشارع في إيدينا.

وأكيد لسة في حلول كتير بس عايزة اللي يكتشفها.

أصدقائي من الإخوان.. مش شطارة انكوا تحشدوا الناس ورا مرشحكم صد مرشح الفلول.. ولا بلاش تغالوا في الطعن على وطنية وأخلاق اللي هيقاطع أو مش هيدي له صوته، لأن مواقفكم من حاجات كتير بعد الثورة خليتكوا متفرقوش عن الفلول في نظر ناس كتير أنا واحدة منهم، هما قتلوا وانتوا وقفتوا تتفرجوا علي الدم، وبباركتوا للي قتل كمان واديتوا له شرعية وصقفتوا له وحيتوا في مجلسكم، ومبدأتوش تنادوا بسقطوا إلا لما وقف ضد مصالحكوا، فمش وقت مزايدات عشان اللي بيته من إزاز ميحدفش الناس بالطوب.

وكمان مرسي زيه زي أبو الفتوح وحمدين ساهم في تفتيت الأصوات وأدي للفلول فرصة أنهم ينجحوا.. بصراحة كل المرشحين عندي سواء في النقطة.. كل واحد مفكرش غير في مصالحه وفي أنه يبقي رئيس جمهورية.. قسموا أصوات الثورة وكفروا الناس بيها أكتر ما هم كفرانيين.. واللي جاي يقولك الشعب المصري شعب عبيد يتلهي الله يكرمه اليومين دوول مش ناقصاه أصوات حمدين وابو الفتوح أكتر بكتيير من الأصوات اللي أخدهم شفيق.. يعني الشعب اختار الثورة بس الثورة هي اللي متفرقة.

والإخوان لازم يعرفوا أن الناس اللي هتدعم مرسي هيكون دعم مشروط بأنهم يقدموا ضمانات لمدنية الدولة والديمقراطية والمحاكمات لرموز الفساد وتطهير المؤسسات، وحقوق الشهداء.. والاتفاق علي تأسيسية الدستور أن يكون فيها تمثيل لكل طوائف الشعب بجد .. مش لجنة زي بتاعة أم أيمن.

أخيراً سواء نجح شفيق أو مرسي الاثنين مش هستني منهم خير.. بس اللي هيمسك البلد دلوقتي بيعتبر ماسك بلد على مية بيضا لا دستور ولا قانون ولا في مؤسسة واحدة توحد ربنا ماسكة نفسها وشادة حيلها.. والأحزاب والحركات السياسية كلها من اليمين للشمال زي خيبتها.

المعركة الجاية معركة الدستور .. ناويين تشتغلوا عليها ولا هتقعدوا تعيطوا لحد ما العسكر يلعبها وتكملوا عياط على الدستور كمان؟؟!!!

تهيؤات رئاسية

أوقات بسأل نفسي هو واحد زي عمرو موسي دة مرشح نفسه للرئاسة لييييه؟؟ يعنى دة واحد عمره 76 سنة.. لا قدر الله لو كسب هيمشي من المنصب وهو عندو 80 سنة .. طبيعى ان الناس لما بتكبر طاقتها بتقل.. وجهدها بيقل وطموحها بيقل.. دى فطرة ربنا اللى خلق البشر عليها... اللى فى عمره دلوقتى بيتقاعد.. بيشتري بيت في مكان هادي ويقعد يسمع موسيقى ويقرا كتب ويستمتع بوقته مع أحفاده.. دة عن الفطرة البشرية اللى مش هنختلف عليها... بس ممكن نختلف في آرائنا من مواقفه في نظام مبارك ولا صمته على هذا النظام.. ولا دوره فى الجامعة العربية.. ولا كم الخواء اللى في كلامه.. وبرنامجه اللى تقريبا بيعيد النظام بأبسط مظاهره.

وشفيق ربنا يكمله بعقله بصراحة... لازم نراعي ظروفه الراجل قتل واتقتل.. وبالنسبة له للاسف الثورة

نجحت. قلباً وقالباً مع خالد على... دم جديد وروح جديدة... وشوفت في مصر الشابة القوية اللى عايزة اشوفها واعيش فيها... بس عقلي بيقولى أنه محتاج يثقل شوية... هو والبرادعي أتمني أشوفهم من أول رجال الرئيس القادم أيٍ كان.

يتبقى الاتنين اللى محيرني حمدين صباحي وأبو الفتوح أبو الفتوح منهجه احتوائي للغاية.. لكن متخوفه منه في سيناريوهين الاول صدامه مع الإخوان والثاني صلحه معاهم... بالبلدي لو اتخانق مع الاخوان هيتخانق اووي.. ولو اتصالح معاهم هنبقا لبسنا احنا.

وحمدين صباحي برضة رجل لا اختلف عليه.. لكن عندي حساسية مفرطة من الناصرية اللى على الرغم منه أنه بينكرها إلا أنها واضحة وضوح الشمس في كل تصرفاته وأفكاره وحركاته.. وإن كنت معجبة بالناصرية فى فكرة القومية والمشاريع القومية اللى

. أما عن مرسي فبيعداً عن ان استبن.. مش مقتنعة ان البلد ممكن تنهض بالمشاريع العملاقة اللى هتتنفذ بقروض من برة.. مقتنعة اكتر ان الفكرة دي هتلبسنا فى الحيطة اكتر :/ وعمرى ما هنتخب مرشح حواليه كم الكذب والتضليل والمغيبين دوول.

وبالرغم من أني لاقية أسباب كتير للى بيدعوا للمقاطعة ومتفهمة دوافعهم.. إلا أني مش لاقية أهداف حقيقة ممكن نكسبها من المقاطعة سوي إننا نتدبس في مجلس العار والخيانة وقت أكتر.. والنتيجة هتكون دم أكتر. 

بس لازم نعترف بحقيقة ان الكتل التصويتية لكل مرشحين الثورة مضروبة بشدة.. ومش هحمل حد مسؤولية دة غيرهم.. لأن هما اللى فشلوا في في إيجاد حلول وتكوين فرق رئاسية... فى الوقت اللى عمل فى الفلول والمجلس العسكري بكل قوتهم على تعطيل الدستور والدعاية لمرشحينهم بقوة.. واللى للأسف ساعدهم على دة مجلس الأغبياء المروج له إعلامياً بمجلس الشعب.

مش قادرة اتخيل أن ممكن بعد كل اللى حصل دة وكل الناس اللى ماتت دي يرجع تانى مبارك في صورة موسي أو شفيق أو واحد حط ايده فى ايد العسكر وما افتكرش الثورة غير لما وقفوا ه فى مصالحه.

بس ارجع واقول لا يغير الله ما بقوم حتي يغيروا ما بأنفسهم.. واحنا لسة في أنفسنا الأنا والفرقة والضعف اللى مسيطرين علينا

اللهم ولي علينا من يصلح... ولا تسلط علينا بذنوبنا من لا يخافك ولا يرحمنا.

سطور كُتبت بدم !!

لأول مرة الكلام ميبقاش لايق على اسم المدونة .. عشان السطور المرة دى السطور مش كُتبت بماء.. المرة دي السطور كُتبت بدم!!

أوقات بسأل نفسي عن الإنسان اللى بيقدر يضرب أو يقتل شخص مش قادر يدافع عن نفسه، عن نوع الإيد اللي ممكن تدبح شخص مصاب في مستشفي.. عن غريزة وشهوة العنف اللي بتحرك الناس دي.

كل مرة يقولوا بلطجي.. طب وهو البلطجي دة مش إنسان ... طب إنسان عاقل ولا مجنون، طب اللي بيعمل كدة بيبقي في وعيه ولا مغيب، طب لو في وعيه عندو هو أسباب ولا حد دافع له، واللي دافع له دافع ليه وكام.. مرة قريت في أسطورة قديمة أن القتل بيشوه روح الإنسان وبيفقده جزء منها مع الروح اللي بيزهقها.. يا تري اللي بيقتل دة بياخد كام عشان يشوه روحه ويفقد جزء منه ومن إنسانيه.

بتجنن أكتر من برود الدم اللي الناس بقت بتتعامل بيه مع القتل.. من اللي بيقولوا يستاهلو... عارفة ان معظمنا إن مكنش كلنا مفيش في أيده حاجة يعملها.. فسحة المظاهرات مبقتش تجيب همها، والفرقة والاستعراضات اللي بقت بتحصل فيها بقت تحرق الدم..  بقى كارت محروق خلاص من كتر ما اسيء استخدامه..

 ولو قلنا خالتك سليمة ماتت ومينفعش الثورة تبقى سلمية مش كل الناس بتقدر على العنف.. والعنف هنستخدمه ضد مين..

ما هو يمكن لو قتلنا اللي بيقتلنا تتشوه أجزاء من أرواحنا زي  ما بتتشوه روحه.. طب ومستقبل ايه دة اللي بقي لازم عشان يجي يتدفع تمنه يا دمنا يا أرواحنا وإنسانيتنا؟؟

بسأل كتير لماذا لا يقضى الله بأمراً يكون مفعولاً على الظالمين.. بس ارجع وأقول لا يغير الله ما بقومٍ حتي يغيروا ما بأنفسهم.. وبسأل تاني طب ليه مغيرناش ما في أنفسنا لغاية دلوقتي... بتيجي في بالي آية وله في ذلك حكمة..

من حيرة لحيرة ومن سؤال لسؤال.. والمشهد كل مرة بيتكرر بنفس تفاصيله.. ونفس إحساس العجز بتاع كل مرة.

إذا كان المؤمن لا يلدغ من جحراً مرتين فنحن أبعد ما يكون عن الإيمان لأننا نلدغ من نفس الجحر مائة مرة ومازلنا نلدغ منه إلي الآن.

رحم الله من ماتوا في العباسية وبورسعيد وأمام مجلس الشعب وشارع محمد محمود وأمام مبني ماسبيرو.. وكل من أًزهقت روحه غدراً...

ليس لها من دون الله كاشفة .. عفوك ورضاك يا الله

بعض الظن وهم

أشياء تشبهنا

نظنها نحن

أرواحاً تسكنا

نظنها نحن

قلوب تحوينا

نظنها تحنً

نمضي في طرق

نظنها توصلنا

نفرح بالرحلة

ونحزن فيها

نظنُ أننا شعرنا

وأن البراءة والمشاعر والسفر

أذابت جليد قلوبنا المتجمدة

ونستمر في المضي قدماً

دون أن نعرف إلي أين الطرق تأخذنا

ثم تتجلى الحقيقة

بما يخالف كل ظنونا

فبعض الظن إثم

وبعضه الآخر وهم

خطوات عملية.. مش هنسيب اسكندرية تتهد

صورة لمبني فيلا شيكوريل بمنطقة رشدي- أبي قير

من أجل المدينة التى تسرق من بين أيدينا
من أجل النضال و الصمود أمام مافيا الفساد و القضاء على كل ما هو عريق
حفاظآ على مدينة الرب الأسكندرية العظيمة
من أجل المدينة البسيطة من أجل الحفاظ على العرق و ما تبقى منا


بدأت مجموعات فى تجميع مجهوداتها تحت راية واحدة حتى نستطيع أن نرفعها جميعآ فى وجه الظلم و الأستغلال
بعد قضية هدم اليونانى
و بعد قضية أرض المحافظة و مبنى شيكوريل الأثرى الذى خرج له قرار وزارى مخصوص بخروجه خارج لسته الآثار و هدمه


المجموعة تتكون من :
مجموعة من النشطاء السكندريين
متخصصين فى هيئة الحفاظ على التراث
مجموعة من طلبة و معيدين كلية الفنون الجميلة
أساتذة من كلية الهندسة 

و غيرهم من الشباب العادى المخلص


أجتمعوا أمس مساءا فى تمام السابعة بمركز الصندرة الثقافى و تم مناقشة الأمر مع المتخصصين من عدة جوانب خاصة بقوانين الهدم و لستة الآثار و التراث .. و تاريخ صدور لستة التراث السكندرى
و أيضآ كيفية العمل على الطعن رقم 10109/ 55
فى قضية فيلا شيكوريل فى الدعوى رقم 12852 المقدمة من الشركة العربية للملاحة البحرية ضد
قطاع الآثار الذى أدرج المبنى ضمن لستة الآثار بالإسكندرية
و حيث ان القانون مطاط و ملئ بالثغرات الرهيبة التى ستعرض كثير من الآثار و المبانى التراثية بالإسكندرية
فبالتالى يجب العمل عليه بعدة أشكال سواء الشكل القانونى أو بالضغط الشعبى


و ذلك من خلال التالى :
1- الضغط الشعبى و الحشد الجماهيرى حول القضية من خلال الوقفات المستمرة أمام الأماكن المعرضة للهدم كالنادى اليونانى و فيلا شيكوريل ..
2- حملة الجرافيتى و الملصقات فى الشوارع لتنبيه أهالى الأسكندرية ان المدينة معرضة للطمس التام
2-تحضير لمجموعات المراقبة و البحث التى ستعمل حسب التوزيع الجغرافى للمجموعات و الشباب المتطوعين للحملة للأبلاغ الفورى فى حين العمل على اى أعمال هدم خاصة بخريطة التراث السكندرى ... و ايضا الكشف والبحث عن الأماكن التى تعتبر من التراث السكندرى و لم تدرج و لا يشعر بها احد الا عند هدمها مثلما حدث فى قضية النادى اليونانى
3- تجميع الداتا الكافية من المتخصصين بمساعدتهم عن الآثار و الأماكن التراثية التى يجب حمايتها فى الأسكندرية
4- العمل على التباحث فى مراجعة لستة التراث السكندرى حيث انه هناك كثير من الأماكن الهامة غير مدرجة
5- بداية فتح التحقيق و البحث فى قضية توسعات القوات المسلحة و الشرطة فى أماكن متعددة على الكورنيش و تحويله إلى كتل خرسانية من المبانى الخاصة بهم
6- العمل على وجود حلول بديلةو عملية و سريعة لملاك هذة الأراضى و الأماكن الأثرية مع الدولة للحفاظ عليها و عدم تعرضها للأبتزاز من قبل المقاولين و مافيا الهدم و تحويلها لملكية عامة تستغل لخدمة المواطنين بشكل نافع و مفيد


و بدأت المجموعة اليوم فى تمام الثانية مساءا للوقوف امام النادى اليونانى المقرر هدمه و تم التعرض لهم من قبل المقاولين و العاملين على الهدم .. وحيث أنه قام أحد الأفراد من هؤلاء المقاولين بالتصريح لنا أنهم قاموا بهذا العمل فى نفس الشارع من قبل فى فيلا مشابهه و أنهم سيستمرون فى أعمال الهدم فى جميع أنحاء حى الإبراهيمية .. و تعرض بعض النشاط للسب و التهديد و تكسير عدسات كاميراتهم


و من المخطط أنه ستقوم مجموعة من النشطاء السكندريين بالتوجه للقاهرة فى صباح الأربعاء 25 أبريل لوقفة أحتجاجية امام مقر وزارة الثقافة بالزمالك لمناشدة وزير الثقافة حيث إنه جهه مهمه جدا فى قضية شيكوريل بصفته رئيس المجلس الأعلى للآثار


تعاونوا معنا و ساعدونا على الحشد و التوعية فى الشارع
الإسكندرية فى خطر
لن نسكت حتى حتى تطمس ملامحها و تتحول لمدينة خرسانية
أدعمونا
أنضموا
للإستعلام أو التواصل :
على الصفحة الرسمية :
http://www.facebook.com/MshHnsybAskndrytTnhd
او
01282166155
01227263959

نقلاً عن صفحة مش هنسيب اسكندرية تتهد 

انقذوا الإسكندرية

تضامنوا مع عدم هدم النادي اليوناني ومعالم المدينة التاريخية

النادي اليوناني أثناء إخلاؤه تمهيداً لهدمه
تصوير عماد ماهر 

"اصرخوا قبل أن ترفعوا الراية البيضاء"، صرخة أطلقتها المدونة إيزيس خليل خلال تدوينة على حسابها على موقع التواص الاجتماعي فيس بوك، لتلفت الانتباه إلي حالات تكرار هدم المباني الأثرية وطمس تراث وهوية مدينة الإسكندرية.

فبعد قرار كمال الجنزوري رئيس الوزراء بمحو "فيلا شيكوريل" الأثرية من  قائمة التراث المعتمدة بالمدينة، وقرار أعضاء لجنة التراث العمراني بالإسكندرية بتجميد عملها احتجاجاً على هذا القرار، فوجيء الجميع بإخلاء مبني النادي اليوناني الذي يقع في شارع متفرع من شارع اللاجتيه بمنطقة الإبراهيمية.

وتأسس النادي اليوناني في عام 1906 وكان مقره فيلا بشارع الأمير إبراهيم يحيي بين حيين الإبراهيمية وكامب شيزار، ولكن هذا المقر تهدم إبان الحرب العالمية الثانية وانتقل النادي إلي مقره الحالى.

رابط تدوينة إيزيس خليل 
http://on.fb.me/IwhkmS